മാർഗരറ്റ് വാൾക്കെർ - വംശപ്പെരുമ
എന്റെ അമ്മൂമ്മമാർ ബലത്തവരായിരുന്നു.
അവർ കൊഴുവിനു പിന്നാലെ ചെന്നു,
മണ്ണിലുഴയ്ക്കാൻ കുനിഞ്ഞു.
വിത്തെറിഞ്ഞുകൊണ്ടവർ പാടത്തു നടന്നു.
അവർ മണ്ണു തൊട്ടപ്പോൾ കതിരു വളർന്നു.
അവർ നിറയെ പാട്ടും ഉള്ളുറപ്പുമായിരുന്നു.
എന്റെ അമ്മൂമ്മമാർ ബലത്തവരായിരുന്നു.
എന്റെ അമ്മൂമ്മമാർ ഓർമ്മകളുടെ കലവറയായിരുന്നു,
ഉള്ളിയും സോപ്പും ഈറൻ ചെളിയും മണക്കുന്നവർ,
ചടുലമായ കൈകളിൽ ഞരമ്പുകൾ പിടയുന്നവർ,
ഒരുപാടു കറയറ്റ വാക്കുകളവർക്കു പറയാനുമുണ്ടായിരുന്നു.
എന്റെ അമ്മൂമ്മമാർ ബലത്തവരായിരുന്നു.
ഞാനെന്തേ അവരെപ്പോലായില്ല?