നിസാർ ഖബ്ബാനി - താരതമ്യ പ്രണയം

നിസാർ ഖബ്ബാനി - താരതമ്യ പ്രണയം

നിസ്സാർ ഖബ്ബാനി

നിന്റെ മറ്റു കാമുകർക്ക്
സദൃശനല്ല ഞാനോമനേ
മറ്റേയാൾ നിനക്കൊരു മേഘത്തെ തന്നാൽ

ഞാൻ നിനക്ക് മഴയാണു നൽകുക.

അവൻ നിനക്കൊരു റാന്തൽ തരികയാണെങ്കിൽ
ഞാൻ നിനക്ക് ചന്ദ്രനെ നൽകും

അവൻ നിനക്കൊരു ചില്ല നൽകുന്നുവെങ്കിൽ

ഞാൻ നിനക്ക് വൃക്ഷങ്ങൾ നൽകും

ഇനി മറ്റൊരാൾ നിനക്കൊരു നൗക നൽകിയാൽ

ഞാൻ നിനക്ക്  യാത്ര തരികതന്നെ ചെയ്യും.

                 * * *

നിസാർ ഖബ്ബാനി -ഞാൻ പ്രണയിക്കുമ്പോൾ

നിസാർ ഖബ്ബാനി -ഞാൻ പ്രണയിക്കുമ്പോൾ

           

        പ്രണയിക്കുമ്പോൾ

ഞാനാണു  കാലത്തിന്നധിപതിയെന്നു

തോന്നിപ്പോകുന്നു. 

ഭൂമിയും അതിലെ സകല വസ്തുക്കളും

എന്റെ അധീനത്തിലാകുന്നു

ഞാൻ എന്റെ കുതിരപ്പുറത്ത്

സൂര്യനിലേക്കു സഞ്ചരിക്കുന്നു.

           

പ്രണയിക്കുമ്പോൾ

ഞാൻ മിഴികൾക്ക് അപ്രാപ്യമായ

ദ്രാവകപ്രകാശമായി മാറുന്നു

എന്റെ നോട്ടുബുക്കിലെ കവിതകൾ

*കറുപ്പിന്റെയും തൊട്ടാവാടികളുടെയും

വയലുകളായി മാറുന്നു.

         

ഞാൻ പ്രണയിക്കുമ്പോൾ

എന്റെ വിരലുകളിൽ നിന്ന്

ജലം കുത്തിയൊഴുകുന്നു.

എന്റെ നാക്കിൽ പുല്ലുകൾ വളരുന്നു

ഞാൻ പ്രണയിക്കുമ്പോൾ

കാലങ്ങൾക്കെല്ലാം പുറത്ത്

മറ്റൊരു കാലമായി ഞാൻ മാറുന്നു.
ഞാൻ ഒരു സ്ത്രീയെ പ്രണയിക്കുമ്പോൾ
എല്ലാ വൃക്ഷങ്ങളും

എനിക്കു നേരേ

നഗ്നപാദരായി ഓടിവരുന്നു.